जाबो जिन्दगी
एक बोतल बियर झै छ
पिउनै नपाइ सकिने
मेयर सापलाइ छोटो लागीरहेछ
यो दिब्य पाँच बर्ष
एउटा घडेरी भन्दा भन्दै सकिने
एउटा डोजर भन्दा भन्दै सकिने
छोरोलाइ अस्ट्रेलिया पठाउने कहिले
छोरीको बिहे गरिदिने कहिले
भान्जी ज्वाइको रिन तिर्ने कसरी
पार्टीका साथीलाई लापलुप्प गराइदिने के गरि
सपनाहरु आफै तर्साउछ्न मेयर सापलाइ
एउटा मतदाता आउँछ
र सित्तैमा बनाउन खोज्छ नागरिकताको सिफारिस
यसो हेर्नू पर्दैन त्यसले कुर्सीतिर?
छिमेकी आउँछ
बिथ्थामा पार्न खोज्छ खानेपानीको बजेट
मेयर सापलाई भाग छुटाउन पर्छ कि पर्दैन?
फूपुको छोरालाई डोजर लगाउन पठायो
कमिसन उ मात्र खान्छ
दाइको त बालै छैन
बिहे दर्ता
सम्बन्ध बिच्छेद
घर कर
भैंसी कर
बाख्रा पालन कर
यी त सरकारी भैहाले
बडो तनाव छ मेयर सापलाई
राजनीतिमा लागेको बीस बर्षपछि
मेयर सापको हातमा परेको हो लडडु
लड्डुमा त कमिला रहेछ्न
लड्डुभरिका कमिलाहरु
कति दु:ख दिइरहेका छन
हेर्नुस त गापाको अफिसतिर
जाबो पाँच बर्स त
डोजरको डाडु जस्तो लाग्छ
खन्छ मेयर सापको जिन्दगी
भिरालो बनाउछ मेयर सापका सपनाहरू ।
